
द्वी दिन कि हौरि छ खैरि मुट्ट बोटिक रख
तेरि हिकमत आजमाणू बैरि
मुट्ट बोटिक रख
घणा डाळों बीच छिर्कि आलु घाम ये मुल्क बि
सेकि पाळै द्वी धड़ी छि हौरि
मुट्ट बोटिक रख
सच्चू छै तू सच्चू तेरु ब्रह्म लडै़ सच्ची तेरि
झूठा द्यबतौं कि किलकार्यून् ना डैरि
मुट्ट बोटिक रख
हर्चणा छन गौं गुठ्यार रीत रिवाज बोलि भाषा
यू बचाण ही पछयाण अब तेरि
मुट्ट बोटिक रख
सन इक्यावन बिटि ठगौणा छिन ये त्वे सुपिन्या दिखैकि
ऐंसू भी आला चुनौ मा फेरि
मुट्ट बोटिक रख
गर्जणा बादळ चमकणि चाल बर्खा ह्वेकि रालि
ह्वेकि रालि डांडी कांठी हैरि
मुट्ट बोटिक रख।